السبت، 10 مايو 2008

؟؟؟ لا أدري

لا أجيد اختيار العناوين ... اذا نظرتم الي المواضيع السابقة ستجدون عناوينها تقليدية جدا


أجتهد لاجعل العنوان معبرا ومميزا في نفس الوقت (ليقول لكم ان الموضوع ليس بهذا الملل الي تتصورونه ) .. وأفشل في كليهما للاسف



ولكنكم توقعون موضوع هذه التدوينة بلا شك



..سأحاول تفادي خطأ البوست السابق وأدخل في صلب الموضوع مباشرة





يحيي ويمني؟؟ .. بخير الحمد لله


لا لم يبدؤا الامتحانات بعد والا ما استطعت التدوين


ولكن( مود) الامتحانات يسيطر علي البيت

الكتب متناثرة هنا وهناك ... ساعات النوم زادت ... الجميع يشكو من صداع مستمر



لا مانع من وجود بعض السعال



.. درجة أو درجتين زيادة في حرارة الجسم ستجعل الامر يبدو أكثر من محاولة هروب من المذاكرة




ولكن ... لا بأس لقد اعتدنا تلك الاساليب .. وعرفنا كذلك الطرق المثلي للتعامل معها








! ! ! ! !


ها قد خرجت عن الموضوع ثانية


تذكروا .. أنتم السبب هذه المرة



لتعد الي موضوعنا سريعا



الزمان : العام الماضي بعد شهر تقريبا من الآن (أعني شهر 6 العام الماضي لمن لم يفهم ما أقصد)




المكان : لجنة امتحان ... لغة عربية علي الأرجح





لو دققتم النظر لوجدتم يحيي يجلس في منتصف الصف الأوسط


أمامه ياسر .. خلفه صديقهم يوسف




هل لاحظتم ما ألاحظه ؟؟!



يحيي غاضب .. غاضب و متوتر أيضا





لا ... ليس من الامتحان


من الواضح أنه أنهي الاجابة ومستواه -بفضل الله- ليس سيئا في اللغة العربية


لا أبالغ ان قلت أنه ممتاز فيها


ستفهمون ما يحدث ان ركزتم في نظرات يحيي التي يرسلها لمن حوله




الأولي : لأستاذ عبد الجواد المراقب الذي علا صوت (شخيره) عازفا سيمفونية رائعة تقول ان البعوض لم يسمح له بالنوم الليلة الماضية




الثانية : لأستاذ مسعد الي ترك اللجنة ليتجول في الممر مطلقا بفمه ذلك الصفير المزعج




الثالثة : لشلة بودي المجاورة ليحيي في اللجنة




يبدو أنهم يحسمون خلافا صغيرا!!




حاتم (الذي سنعرف بعد قليل أنه بودي زعيم الشلة) : لأ يا حمار .. دي نعت .. كده هتودونا ف داهية




حازم : لأ والله .. دي مضاف اليه مش فاكر حلة المحشي


حسام : لأ .. كانت حلة محشي هي اللي مضاف اليه




آه ... انهم يحاولون تذكر المثال الي طرحه عليهم أستاذ حمدي كي يذكرهم كيف يفرقون بين النعت والمضاف اليه




اذا كانت الجملة علي وزن حلة المحشي .. اذن المحشي مضاف اليه


واذا كانت حلة محشي .. فهي نعت


الامر واضح



ولكن

يبدو ان أيا منهم لم يكن يحب المحشي ... لو كان حماما محشيا لتذكروه




وهكذا .. استمرت الشلة المذكورة في تبادل الشتائم والاتهامات


ويحيي يتميز غيظا




النظرة الأخيرة : كانت من يحيي لكل من ياسر و يوسف .. نظرة تقول أن عليهم أن يفعلوا شيئا


حان الوقت ليبرهنوا علي أن وقت أ\أيمن معهم لم يذهب هباءا


.

.

.

أستاذ مسعد .. أستاذ مسعد

هذا هو صوت يحيي -كما تسمعون-

لقد انطلق معلنا أن وقت المشاكل قد حان


رد أستاذ مسعد بضيق كمن قاطعه أحد من عمل مهم : ماذا تريد؟؟ لا حمام .. لا شرب






ألا تسطيعون الصبر عشر دقائق حتي ينتهي الامتحان ؟؟ جيل مزعج ------- ------ ------ ------- ------ ------

(كلمات أخري أستحي من ذكرها)


رد يحيي بثبات وقد أثار عجبه (وليس اعجابه ) هذا الكم الهائل من الالفاظ البذيئة التي وصف بها أ\مسعد جيلهم الموعود :


أستطيع التحكم في نفسي ..

كما أنني لا أعاني الجفاف .. شكرا






فقط .. أردت أن أخبر (حضرتك ) ان عمليات غش تتم علي نطاق واسع ولا أظن أن هذا مسموحا به ... حسبت أننا في امتحان


اقترب أ\ مسعد منه وقال هامسا بلهجة من يحاول أن يكون ودودا : يابني .. دع زملائك يتعاونون


رد يحيي بنفس طريقة أ\مسعد الهامسة : هذا غش وليس تعاون ... وما تعلمناه أن الغش حرام



هنا شعر ياسر أن دوره قد حان ليتكلم فهتف : قال رسول الله صلي الله عليه وسلم





يوسف ؟؟

لا .. لقد اكتفي بالتصفيق والتصفير عقب كل كلمة من يحيي او ياسر





و . . . . .


فلنكمل المرة القادمة .. تعلمون أن الوقت ضيق والامتحانات علي الابواب


حسنا .. حسنا


لاداعي للالحاح


سأعرفكم في أسطر موجزة ببودي وشلته قبل أن انهي البوست


بودي هو حاتم ... ذلك الي رمقه يحيي بنظرات غاضبه منذ قليل .. نعم نعم ... أقصد الصبي الي لم يستطع التفرقة بين النعت والمضاف اليه


لماذا كان يحيي غاضبا منه ؟؟

بالطبع لأنه كان يغش





عفوا

.. بل هو قائد كل عمليات الغش المنظمة التي تتم في المدرسة ان شئتم الدقة

له باع طويل في البراشيم والكتابة علي المساطر ..وتهديد المراقبين




وقد عرفنا فيما بعد أنه كان صاحب السبق في استخدام الموبايل لاغراض غير شريفة داخل لجنة الامتحان



نعلم أن الطلبة يستخدمونه منذ زمن ...لكنه كان أول من استخدمه في ثالثة ابتدائي


وهو أيضا صاحب العبارة الشهيرة * أنا ابن أخت المدير الجديد يا حبيبي *



الرجل الثاني في الشلة هو تيتو .. يقولون أن اسمه في شهادة ميلاده هو حازم


ولسبب ما تصر أمه علي مناداته بتيتو

.. لا أري علاقة بين اسمه الأصلي وبين تيتو .. لا يوجد في حازم تاء أو ياء أو واو


لأمهات هذه الأيام أذواق غريبة فعلا!!


قابلت أمه ذات مرة .. لم تكن مقابلة في الواقع كانت مشاجرة

هي و أم بودي ( عفوا أقصد حاتم) في صف .. و أنا و أم ياسر في صف



اذا أردتم أن أصفها لكم فهي باختصار من ذلك النوع الي يسارع بالخضوع بالقول ما ان يلمح ظل رجل في المكان
انها من النوع الذي تثير اعجابي قدرته علي حمل كل هذا الكم من الاصباغ علي وجهه دون ان ينحني ظهره للخلف



انها من ذلك النوع الي لا أطيقه .. كل ما أكرهه تجمع ليصنع أم تيتو
اوووووووووووو
ما هذا الذي أقوله ؟؟
أتبستمون بينما أغرق أنا في بحر الغيبة ؟؟
أين النصيحة بين المسلمين اذن ؟ .. أهذه هي حقوق الأخوة ؟



لا اله الا انت سبحانك اني كنت من الظالمين

فلأنتهي منها الموضوع الكريه اذن
آخر أفراد شلة ال----( تم الحذف لتناقضها مع الاستغفار السابق ) هو حسام
ينادونه بمادي (هذا مقبول .. يوجد حرف الميم علي الاقل )
والآن .. الي اللقاء في تدوينة قادمة باذن الله نكمل فيها ذلك الحوار الي دار بين أ\مسعد وبين يحيي
.. ونعرف فيها ما فعلته شلة بودي في يحيي وياسر .. وكيف تصدوا لهم
السلام عليكم

هناك 32 تعليقًا:

أمين المكتبة يقول...

انا اول تعليييق ... مش عارف ليه الناس بيفرحوا لما يبقوا اول تعليق !! كان عندي واحد في المدونة يخش عشان يكتب اول تعليق ، تاني تعليق .. خامس تعليق .. سابع تعليق ويمشي مايقولش حاجه !! يمكن تكون ميول احصائية !! مش عايز اظلمه

المهم .. الموضوع نصه التاني كان محتاج مهارة توقع وحدس حالي لاستنتاج ماترمين إليه .. بس فهمت منه انك معجبة جدا بابنك يحيى

بس عندي سؤال .. الشخص المحافظ قوي ده مش بيتعب ؟؟ يعني جميل انه يكون بيذاكر وينجح بمجهوده ويتعلم الاعتماد على نفسه في الحياة .. بس برضو حتة انه يقول للعيال ماتغشوش دي مش عارف بصراحه صح ولا غلط ! هو مايغشش واللي يسأله فالسبب انه عايز ينجح بمجهود ومايغششش حد منه لإن ده بيخالف مبدؤه بس العيال تعبانه ومستواها ضعيف والتعليم تعبان .. هو ممكن يقولهم بود بعد الامتحان هيبقى لطيف لو الانسان نجح بمجهوده .. بس في وجهة نظر تانيه انه لازم يتعود من صغره الجرأة والشجاعه في الحق حتى لو هيخسر صحابه .. ولما يكبر هيفهم اكتر .. بس ارجع واقول لنفسي مهو كده هيتربى على مثاليه عاليه قوي هتتعبه في الحياة هيحكم على الناس لمجرد انهم بيغشوا .. والله ماعدت عارف حاجه ..

عموما موضوع جميل .. وبالمناسبة انا شغلي في التصميم اصلا فالصور دي من صميم عملي وشايف حضرتك بتتعبي في جمع الصور للموضوع .. فهادي لحضرتك موقع ممتاز جدا في الصور وبنعتمد عليه كمصممين إلى حد كبير جدا ولما بتشتركي بيديكي صور من غير علامة مائيه وصوره ممثله واحترافيه
corbis.com



تحياتي

ام يحيي يقول...

الاخ الفاضل \اخ جامعه

اسفه علي نص الموضوع التاني .. حصل خطأ ونشرته قبل ما أعدله .. لكن دلوقتي الحمد لله اتظبط

فعلا الشخص المحافظ بيتعب .. في ناس بتعتبره مثالي قوي او محبكها زيادة عن اللزوم .. في ناس تانيه بتعتبر ده عائق امام انفتاحه علي المجتمع
كلها وجهات نظر تستحق الدراسة .. أكيد بيتعب
يكفي وصف الرسول صلي الله عليه وسلم القابضون علي الجمر


لكن لو حضرتك تقصد أسلوب التربية .. وانه الاحسن ينصح أصحابه بدل مايدخل في مواجهه معاهم.. فده أكيد صح بس مع ناس تانية غير بودي وشلته
كان لازم حد يواجههم ويوقف فسادهم اللي بدأ يستشري في المدرسة لان ليهم بالفعل تاثير سلبي علي الطلاب اللي مكنوش بيغشوا

وبعدين صعب اوي نطالب اطفال في سن يحيي بالحكمة .. احنا بنعلمهم يكونوا ايجابيين .. وميسكتوش علي الغلط
يمكن في المرحلة التانية نعلمهم ازاي يتصرفوا صح في المواقف المختلفة
لكن ده بعد ما تترسخ عندهم القاعدة الاولانية


جزاكم الله خيرا كثيرا علي الموقع لان فعلا بتطلع عيني عما بلاقي الصور المناسبة
صحيح انا مبفهمش اي حاجة في التصميم ..لكن ادينا نحاول


جزاك الله خيرا مرة اخري

أميمة كامل يقول...

تعرفى يا ام يحيى الواحد منا يجد صعوبة شديدة جدا انه يرسى مثل هذه القيمة فى نفوس اولادنا وهذا بسبب المدرسين الذين يسمحون بالغش فى اللجان فيجعلون قيمة مثل قيمة الامانة تهتز فى نفوس اولادنا ويصبح الاولاد محتارين هل دا صح ولا خطأ كما نعلمهم؟
ربنا يحفظهم من كل سوء

روينا يقول...

ازيك يا ام يحيى لكى وحشه ياشيخه
بالنسبه لرايئ فى البوست
فزى متعودنا منك جميل جميل جميل
وزى متعودتى منى ان ده طبعا مجامله
لا والله بهزر موضوعك جميل
بس ليا ملاحظه وخداها عليكى
لما الواد يحيى قال للاستاذ بتلعه انه معندوش جفاف
لايختى ابنك الايام دى وشه اصفر وهفتان خالص
يابنتى متخلهوش يتكسف من خالته وخليه يجى ياكل من مدونتى

مصعب رجب يقول...

السلام عليكم ورحمة الله وبركاته يا أم يحيى
وسلام مني مباشرة إلى الأخ يحيى

جزاكم الله خيرا
الموضوع رائع ويتناسب تماما مع ظروف الامتحانات التي يوجد فيها آدميون يصرون على الإنعام على السيد إبليس بأجازة محترمة يقومون هم فيها بوسوسة الآدميين أمثالهم لممارسة الغش بينما الشيطان يتفرج وهو يضع إحدى قدميه على الأخرى ويضع الاثنتين معا على قفا كثير من الناس .

صدق الله العظيم : وكذلك جعلنا لكل نبي عدوا شياطين الجن والإنس يوحي بعضهم إلى بعض زخرف القول غرورا ولو شاء ربك ما فعلوه فذرهم وما يفترون .

ولكن عندي تساؤل ملح :
ماذا فعل بودي ( وفي رواية أخرى : حاتم ) في يحيى وياسر وسعيد بعد أن حرموهم من لذة الغش الممتعة ؟
أتوقع أن يحيى لم يعد إلى البيت وإنما ذهب إلى أقرب مستشفى .. أم أن توقعي غير صحيح ؟

اوعى تفكر يقول...

تصدقى كان نفسى اعمل زيي يحيي
فى يوم من الايام كانت النتيجه علقه محترمه
والمدرسه كلها اتفرجت عليا
بس انا كنت فرحان وانا بضرب
عشان عملت الصح وربنا جزانى خيرا
فى السنه دى
لكن بعد كده كنت بسكت مش عارف ليه
يمكن عشان كده دخلت معهد
المهم ربنا يبارك فى يحيي كمان وكمان
ونكون ايجابيين اكتر زيه

أنفاس الصباح يقول...

سبحان الله كنت داخلة اعلق على الصور لقيت اخ جامعة سبقنى ده الى اسمه توارد خواطر ؟ فعلا ممتعة مدونتك ,الاسلوب والصور المختارة بمزاج والخط والاتساع فى الصفحة الواحد بيحس براحة وجمال ده غير الفكرة الهادفة الى بتوصل بسلاسة واسلوب جميل بعيد عن سلبيات الوعظ الى ممكن يكون ممل عند البعض ,ربنا يوفقك وينجحك منغير غش فى اللجنة قصدى يحى يعنى.

CrY2DaY يقول...

ربنا يخلى يحيى ويمنة
ويبارك فيهم يارب

كل الناس خايفة من الامتحانات انا مش عارف لية مع انة خلاص بقى احنا اتعودنا على السهر والتعب والمزاكرة طول الليل .. مفيش مانع ان الخوف موجود ... واهم شىء النتيجة تكون كويسة ان شاء الله

ــــــــــــــــــــــــــ
دعوة لفعل الخير
اتمنى زيارة مدونتى
تحياتى

ام يحيي يقول...

om _aiman
والله حضرتك متعرفيش أنا بفرح أد ايه لما حضرتك او خاتو ايمان العزب بتنوروني في المدونة

جزاكم الله خيرا .. وبارك في أولادكم جميعا ويكونوا جيل النصر باذن الله

ام يحيي يقول...

روينا
يا أهلا يا أهلا
جزاكي الله خيرا علي الرقة والذوق المفاجئين اللي نزلو عليكي مرة واحدة كدة


ويحيي بيسلم عليكي وبيقولك متشكر جدا
الجفاف اللي عنده أرحم من التلبك المعوي اللي هيجيله او أكل من مدونتك

وبعدين انتي معندكيش ديليفري؟!

ام يحيي يقول...

أبو أسامة

وعليك السلام ورحمة الله وبركاته

فعلا .. في ناس بيتولوا المهمة عن ابليس

والمشكلة ان الموضوع ده منتشر جدا حتي في الكليات لدرجة انهم خلاص معدوش بيعتبروه حاجة غلط !

رأيي ان المسؤول هو الاب و الام .. تلاقيهم بيدعوا لولادهم ان ربنا يوقعهم في مراقب طيب يسمحلهم بالغش

لو كل واحد (بالذات اللي في الكليات حط في دماغه ان لو غش معناها انه هياخد درجات مش من حقه .. معناها انه هيجيب تقدير مش من حقه وهياخد وظيفة غيره كان أحقبيها وهياكل فلوس حرام مكنتش من حقه (والمشكلة انه مش هيعرف يرد الحق ده لصحابه) أعتقد كان هيفكرالف مرة قبل ما يغش

للأسف .. احنا بتبسط الامور أكتر من الازم ..وهو ده سبب اللي احنا فيه

ام يحيي يقول...

ايمان العزب

نورتينا يا خلتو

جزاكي الله خيرا مرة تانية

ام يحيي يقول...

cry2day

جزاك الله خيرا .. وان شاء الله نزور مدونتك قريب

ام يحيي يقول...

اوعي تفكر

اسفة حصل خطأ و الرد جه في الآخر

معلش الضرب للجدعان .. واهو كله في سبيل الله

ان شاء الله كلنا نبقي ايجابيين اكتر

غير معرف يقول...

بصراحة هاي اول مرة ادخل واقرا في مدونتك يام يحيى مع اني بعرفك وبعرف يحيى كويس ما شا الله عليه ولد غير شكل وامه كمان غير شكل
حتجول شوي بالمدونات التانية وارجعلك يا ام يحيى

غير معرف يقول...

عدنا
خلصت اللفة تبعتي في المدونات الرهييييييييييبة
جد شي بيجنن
استمري
بس حرام انتي جوعتيني بالصور محشي وحمام
يلا غير شكل

غير معرف يقول...

نسيت اقلك مش حسكت الا لما تعزميني عندك
عالاكلات هاي بس خلي خالتو هي اللي تعملها
الله يعين ابو يحيى والولاد على اكلك

ام يحيي يقول...
أزال المؤلف هذا التعليق.
ام يحيي يقول...

غير معروف اللي انا عارفاها

ماشي ماشي يا ستي .. اكمن انتي يعني بلديات يحيي عياش ( بتسخري) من اكلي
لا بقي انا مبخفش ..اليهود هما اللي كانو بيخافو منه

وبعدين مش أحسن من المقلوبة بتاعتكو؟؟

علي فكرة بقي .. يحيي وأبوه بياكلو صوابعهم وراه

ده حتي يحي مبقلهوش غير 3 صوابع في الايد اليمين!

غير معرف يقول...

السلام عليكم
يا رب بالتوفيق ليحى فى امتحانات السنة دى
ويتخرج ويبقى مجاهد أد الدنيا إن شاء الله

Hosam Yahia حسام يحيى يقول...

ماشااااء الله

بس كويس ان يحى لسه ماقابلش الطرق الجديده

لسه لجنته كلها مااستخدمتش حاجه جديده


عندنا بقا كل الجديد

:d

انا اسمى حسام انا كمان

بس هيا مش مضاف اليه

:)

خديجة عبدالله يقول...

روعة وزى العسل كمان

مدونتك تحفة بجد :)ربنا يتقبل منك وينفع بيكى

بس هاتى ودنك هنا هوة ازاى عندك يحيى ويمنى وانتي عمرك 21 سنة

موعارفة يمكن في غلط بس ازاى ؟ازاى برضه ؟

عن موضوع التدوينة أسلوبك في العرض ممتع جدا وراقي جدا

وفعلا نحتاج أن نغرس القيم الإسلامية فى أولادنا ..ربنا يرزقك بر يحيى ويمنى بس ازاى ازاى ؟

ربنا يوفقك ودمتى بكل خير

khobayb يقول...

كالعادة يا أم يحيى ..

موضوع فوق الرائع ..

ولا تعليق عندي غير :

جزاكم الله خيرا ..

ها قد أجزلت لكِ في الثناء

---

فقط أود أن ألفت نظر حاتم (بودي) وشلته .. إلى مسألة متعلقة بمثال الأستاذ حمدي :

إن كلمة "محشي" تظل مضافا إليه في كلا الحالتين ؛ المعرفة والنكرة

لكنني أعذرهم على أية حال ، فلا أتوقع أنهم كانوا ينتبهون إلى أمثلة الأستاذ حمدي ، وإلا ما احتاجوا إلى الغش أصلا !

---

وفق الله ابنيك في الامتحانات

ام يحيي يقول...

عمر المصري
وعليك السلام ورحمة الله وبركاته

آمين .. ولك المثل ان شاء الله

جزاك الله خيرا علي المرور

ام يحيي يقول...

حسام يحيي

ربنا يوفقكو وتكتشفوا كل ما هو جديد في عالم الغش ..عشان تقاوموه طبعا

اجابتك صحيحة .. ليك حلة محشي عند أ\حمدي

مبروك .. وبالتوفيق المرات القادمة

ام يحيي يقول...

خديجة عبد الله

جزاكي الله خيرا علي رأيك في المدونة

وهاتي بقا ودنك عشان اقولك علي السر

لو حسبناها ببساطة كده ..انا سني 21 سنة
يعني صعب اوي _زي ما انتي قولتي_ يبقي عندي يحيي اللي ف رابعة ابتدائي

الحكاية كلها تخيل .. اماجيناشن يعني

كنت قاعدة مرة مع واحدة صاحبتي بنفكر ف أسماء ولادنا( ان شاء الله يعني)
فقولتلها انا هسميه يحيي ان شاء الله وقعدت اتخيل شكله .. وهربيه ازاي؟
هيا ماصدقت وراحت مغيره اسمي علي موبايلها لأم يحيي

وانا عشت في الدور زي ماانتي شايفة
الي ان يرزقني الله بيحيي وأبو يحيي

ولو أخدتي بالك من وصف المدونة هتلاقيني كاتبة اني بتخيل ان لي طفل يعشق البطولة وبهوي الخيال

نورتي المدونة ..جزاكي الله خيرا

ام يحيي يقول...

خبيب

جزاك الله خيرا علي المرور والتعليق ..والدعاء

الحمد لله اني موديتش يحيي ياخد درس عند ا\حمدي.. كان هيضيعله مستقبله

وعلي العموم اهو درس لبودي وشلته عشان يبطلوا غش

دمتم بخير .. ونجاح
ربنا يستر ويكون يحيي عمالها صح

اسلام صديق يقول...

تدوينة رائعة جدا

ومدونة لذيذة جدا


وفقك الله

غير معرف يقول...

ازيك يا ام يحيى انا روينا بكتب من الكورس اوعى تنسلى اللى اتفقنا عليه ادعيلى سلام وحشتينى والله
لا اله الا الله
سلميلى على منمن

Hosam Yahia حسام يحيى يقول...

ايه فين جديد حضرتك

مود الامتحانات ولا ايه

:)

عفوا أنا أميرة يقول...

السلام عليكم ورحمة الله وبركاته
أخبارك ايه يا أم يحيى وأخبار امتحاناتك ايه وأخبار.....!
بلاش فضايح المهم بجد مدونه متميزه أسلوبك رائع فى العرض ربنا يوفقك
أم آدم وإسماعيل
أكيد عرفتينى....

غير معرف يقول...

how can you write a so cool blog,i am watting your new post in the future!